Vossa donaziun pussibilitescha da cumprar al lieu products duvrads urgentamain e bain enconuschents a las persunas che survegnan quels. Uschia vegnan sustegnids ils martgads locals. En pli pon ins evitar lungs viadis cun camiuns a travers l’Europa ed impediments birocratics. Pachets online èn perquai bler pli economics ed ecologics. Ed els pussibiliteschan da satisfar exactamain ils basegns dals umans en miseria.
Cun la summa da donaziun po la Crusch Cotschna Svizra, en collavuraziun cun las societads da las Cruschs Cotschnas naziunalas en Bosnia-Erzegovina e Moldavia e cun la Mesaglina Cotschna Kirghisa, cumprar al lieu artitgels dal basegn fundamental (per exempel mangiativas, artitgels d’igiena e material da stgaudar) e surdar quels a persunas povras.
Cun Voss pachet gidais Vus umans en miseria. Quai pon esser persunas pli attempadas u malsaunas, geniturs ch’educheschan sulets e lur uffants ed autra glieud ch’è da la vart sumbrivauna da la vita. Grazia a Vossas donaziuns po la Crusch Cotschna sustegnair els directamain cun mangiativas e cun artitgels d’emprim basegn.
Pachets online per «2 x Nadal» pon vegnir tramess durant l’entir onn: pachet online
La 22avla acziun da «2 x Nadal» vegn organisada dals 24 da december 2018 als 11 da schaner 2019. Durant l’acziun pudais Vus dar si Voss pachet senz’adressa cun la remartga «2 x Nadal» a mintga spurtegl da posta ed el vegn tramess gratuitamain a la Crusch Cotschna Svizra.
Mettai mo mangiativas u artitgels d’igiena e tualetta durabels en Voss pachet. Las mangiativas duessan esser conservablas anc almain sis mais. Prendai il meglier products sco té, café, pasta, ris, ieli u conservas. Fitg tschertgads èn er artitgels da tualetta sco pasta da dents, barschuns da dents, vatta, savun e schampo.
Grondezza maximala: 100 x 60 x 60 cm
Pais maximal: 30 kg
Na, mintg’onn avran tschients voluntaris en il center logistic da la Crusch Cotschna Svizra a Wabern sper Berna ils pachets ch’arrivan. La rauba vegn zavrada e messa ensemen e lura tramessa vinavant a las societads chantunalas da la Crusch Cotschna. Quellas surpiglian la repartiziun da las mangiativas e dals products d’igiena a persunas en basegn. Tschertas societads chantunalas sustegnan cun quai instituziuns socialas che gidan persunas povras en Svizra.
Vus As pudais annunziar per collavurar cun zavrar la rauba furnida per la repartiziun. En il center logistic da la Crusch Cotschna a Wabern sper Berna e tar las societads chantunalas s’engaschan mintg’onn tschients voluntaris.
In’interpresa po trametter pachets postals u pachets online. Ubain ch’ella pussibilitescha a ses collavuraturs da gidar la Crusch Cotschna a Wabern sper Berna u ina societad chantunala a zavrar la rauba furnida. Quels engaschaments voluntaris da collavuraturs pon vegnir organisads ensemen cun la Crusch Cotschna Svizra u cun ina societad chantunala da la Crusch Cotschna.
Las societads chantunalas da la Crusch Cotschna Svizra dattan ina part da las donaziuns ad instituziun socialas. Quai èn per exempel chasas da dunnas, chasas per uffants maltractads, alloschis da fugitivs u posts da consultaziun per persunas en povradad.
Mangiativas e products d’igiena vegnan duvrads mintga di. Cun quai pon ins sustegnair il pli effizientamain persunas en povradad.