Sminuir la povradad

Sustegn en Svizra

En Svizra vivan 8,5 pertschient da la populaziun en povradad. Ina persuna singula pertutgada da la povradad sto pudair viver cun pli pauc che 2279 francs il mais, ad ina famiglia cun dus geniturs e dus uffants stattan a disposiziun 3963 francs. Vitiers vegnan in mez milliun umans che vivan a la sava da la povradad. En tut èn damai passa 1,3 milliuns persunas pertutgadas da la povradad. «2 x Nadal» permetta a Vus da sustegnair – a moda directa u via instituziuns – ils umans pertutgads.

Christoph Ditzler da Basilea: «La povradad è invisibla»

«Jau hai adina pensà che jau chattia franc puspè ina plazza. Ma quai n'è betg stà il cas – jau n'hai gì nagina schanza pli sin il martgà da lavur. Oz hai jau 67 onns e sun pensiunà. Jau viv cun mains da 2'000 francs il mais. En il project «Planet 13» hai jau chattà ina nova incumbensa sco manader da project che jau fatsch en uffizi d'onur. Il Planet 13 porscha a persunas pertutgadas da la povradad in access gratuit a l'internet. L'internet è oz impurtant per restar integrà – per exempel per tschertgar in'abitaziun u ina plazza. Vi dals giasts dal Planet 13 na ves'ins betg ch'els èn povers. La povradad en Svizra è invisibla.»

Guardar il video

Zekia Sheik Moussa da Basilea: «Mintgatant na tanschan ils daners betg pli per far cumissiuns»

«Mo star a chasa, quai n'è nagut per mai. Per mai èsi impurtant da pudair lavurar. L'atelier da cuser da la Crusch Cotschna ma dat questa pussaivladad, quai ma fa ventiraivla. En il mintgadi stoss jau viver cun fitg paucs daners. Cura che jau vom a far cumissiuns, cumparegl jau adina ils pretschs e cumpr mo ils products ils pli bunmartgads. Mintgatant stoss jau er emprestar daners da collegas per ma tegnair sur l'aua.»

Zekia Sheik Moussa fa diever da la purschida da l'atelier da cuser da la Crusch Cotschna a Kleinhüningen. Ils pachets da «2 x Nadal» distgargian in zichel il stgars budget da Zekia Sheik Moussa e sia famiglia.

Guardar il video

Agid a l'exteriur

Las donaziuns dals pachets online vegnan dabun ad umans pertutgads da la povradad en l'Armenia, la Moldavia, il Kirghistan e la Bosnia-Erzegovina. En il center stat qua il succurs d'enviern. La Crusch Cotschna sustegna umans pertutgads particularmain fitg da la fradaglia che vivan en relaziuns precaras. Els survegnan pachets cun vivonda, tschaveras chaudas u contribuziuns finanzialas per pudair cumprar sezs p.ex. laina e medicaments.